काठमाडौँ। नेपालको गाउँपालिका राष्ट्रिय महासंघकी अध्यक्ष लक्ष्मीदेवी पाण्डे एसियाभरीका स्थानीय स्थानीय सरकारहरुको साझा संस्थाको अध्यक्षमा निर्वाचित भएकी छिन्।
गत बिहीबार र शुक्रवार चिनमा भएको युनाईटेड सिटिज एण्ड लोकल गभर्मेन्ट एसिया प्यासिफिकको विस्तारित बैठकले उनलाई अध्यक्षको जिम्मेवारी दिएको हो।
नेपाली कांग्रेसबाट नवलपरासीको हुप्सेकोट गाउँपालिकाको अध्यक्ष समेत रहेकी पाण्डेले गत सन् २०२३ देखि यस संस्थाको कार्यसमिति सदस्यका रुपमा रहेकोमा अहिले अध्यक्षको जिम्मेवारी पाएको जानकारी दिईन।
एसियाका ५१ देशका स्थानीय सरकारका हजारौँ प्रतिनिधि तथा सयौँ संस्थाहरु सदस्य रहेको यस संस्थामा नेपालबाट गाउँपालिका महासंघसँगै नगरपालिका संघ पनि सदस्य रहेको छ। यस संस्थाको केन्द्रीय कार्यालय इन्डोनेसियाको जाकार्तामा रहेको छ।
गत २०२३ मा अध्यक्षमा निर्वाचित भएका फिलिपिन्सको क्विटीनो प्रान्तका गभर्नर दाकिला कार्लोको गत सेक्टेम्वर १५ का दिन निधन भएपछि अध्यक्ष पद खालि भएकाले नेपालकी पाण्डेले जिम्मेवारी पाएकी हुन्।
आफुले स्थानीय सरकारहरुको अन्तर्राष्ट्रिय संगठनको नेतृत्व गर्दा अन्य देशहरुसँग नेपालको सम्वन्ध राम्रो बनाउन सघाउ पुग्नुका साथै स्थानीय सरकार सम्वन्धी धेरै ज्ञान र सिप नेपाललाई प्राप्त हुने उनको दावी छ।
नेपाली रेडियो नेटवर्कको नेपाली वहसमा उनले भनिन्, `स्थानीय सरकारसम्वन्धी क्षमता विकास, अध्ययन अनुसन्धान, अनुभव र अवसरका लागि यो संस्थाबाट सहयोग पुग्न सक्छ।´
स्थानीय सरकारका बारेमा संसारभरी पैरवी गर्दै आएको यस संस्थाले नेपालमा पनि विभिन्न परियोजनाहरुको विकास र विस्तार गर्ने तयारी भइरहेको अध्यक्ष पाण्डेले जानकारी दिईन।
