जनकपुर। मधेस प्रदेशमा नयाँ सरकार गठनको प्रक्रिया अघि बढेको छ।
मुख्यमन्त्री कृष्णप्रसाद यादवले राजीनामा दिएसँगै नयाँ सरकार गठनको प्रक्रिया अघि बढेको हो। मुख्यमन्त्री यादवले शनिबार नै पदबाट राजीनामा दिएका थिए।
नयाँ सरकार गठनको प्रक्रिया अन्तर्गत शनिबार नै मधेस प्रदेश प्रमुखको कार्यालयले संविधानको धारा १६८ को उपधारा (२) बमोजिम मुख्यमन्त्री नियुक्तिका लागि बहुमत जुटाउन सक्ने प्रदेशसभा सदस्यलाई दाबी पेस गर्न आह्वान गरेको हो।
नेपालको संविधानको धारा १६९ को उपधारा (१) को खण्ड (क) बमोजिम यादवले मुख्यमन्त्री पदबाट दिएको राजीनामा आजै स्वीकृत भएको थियो। त्यसपछि प्रदेश प्रमुख सुरेन्द्र लाभ कर्णले नयाँ सरकार गठनको प्रक्रिया अघि बढाइएका हुन्।
संविधानको धारा १६८ को उपदफा २ अनुसार प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभा सदस्यलाई मुख्यमन्त्रीमा नियुक्त गर्ने प्रयोजनका लागि आफ्नो दाबी पेस गर्न प्रदेश प्रमुखले आह्वान गरेका हुन्।
प्रदेश प्रमुखको कार्यालयले इच्छुक प्रदेशसभा सदस्यलाई २०८३ साल मङ्सिर ४ गते शुक्रबार दिउँसो ४ बजेभित्र मधेश प्रदेशको मुख्यमन्त्री पदमा नियुक्तिका लागि आफ्नो दाबी पेस गर्न समय सीमा तोकेको छ।
